157 Op huyden compareerde voir den hove van Utrecht Cristoffel van Montfoort ende verclaerdt dat alzoe die gemeen veengenoten van den Rheensche ende Geldersche veenen contribuerende totter grifte aldaer hem comparant geconstitueert hadden met sekere onvrije gheer veens die voirschreven grifte te mogen genieten, mits bij hem passeren acte van condempnatie van dat hij betalen soude alle verleden contributien van de voirscreven veenen dubbel ende voorts an alle vuytsettinge als andere veengenoten na brede inhout van acte van 't voirscreven constitutie dat hij daervan voir hem syn erven ende nacomelingen besitters van den voirscreven geer veens ende nae advenant van den selve beloofden te betalen alle die contributien die voorhenen tot desen dage toe over die voirscreven venen vuytgeset syn geweest al volgende den octroye van zyne majesteit nopende 't greven ende contribueren van den gryften by den keyzerlijke majesteit verleent, beloofden oeck van nu voorts an te betalen alle andere contributien die voorts over die voorscreven venen vuytgeset sullen worden als andere veengenoten contribueren tot die voirscreven grifte, verbindende dair onder zyn persoen ende alle zyne goederen ende specialijk die voirscreven geer veens, deselve submitterende den voirscreven hove, 't gerecht van Renen ende allen anderen wetten ende gerechten, ende versochte hier inne gecondemneert te worden, 't welck gehoort, heeft hem 't hoff dair inne gecondemneert ende condempneert hem dair inne mits desen. Actum den 28e july 1572.

148 Van die aenbrenginge der veenen voor commissarissen anno XLVI ende XLVII.
Copie
Den Xen juny anno XVC [niet ingevuld] is voor mij commissaris voorseid
gecompareert Jan van Cuijck Heijnrzn rentmeester-generael van den edele
welgeboren vrouwe mijn vrouwe Van Hoochstraten, Culenbourch etc.,
mij thonende zeeckere instructie hem bij haer edele mitsgaders van de
mombaren des edele waelgeboren jonckeren Van Pallant onderteykent
so 't scheen met haer edele ende der voorseide mombaers handt. Verclarende
dat hij volgende die voorseide instructie ende in den naem daerinne
verclaert consenteerde ende was tevreden te genieten van den
octroye den gemeenen veengenoten van den Keyser Majesteit gegundt
aengaende die Grifte van biscop David, ende dat in den forme
maniere ende nae luydens zijnder voorseide instructie hiernae
geïncorporeert van woorde te woorde. Hiernae heb ick den
selven rentmeester verclaert dat die voorseide joncker Van Pallant
ofte zijnen facteurs indien hij ofte zij uuyt zijnen naem soude
willen genieten metten anderen veengenoten het effect van 't voorseide
octroye so soude hem van noode weesen volgende 't inhouden van
dien aen te brengen zijnen veenen mit designatie van limiten
ende anderssins nae breder luydens des selves octroys. Waerop
die voorseide rentmeester mij ter andtwoorde gaf hetselfde die mombaer-
heeren te willen rapporteren. Hiernae volcht die copie van den
voorseide instructie. Instructie voor Jan van Cuyck Heijnricxzn
wes hij vanwegen der mombaerheeren mijns eedelen lieven
jonckeren Van Pallant t' Utrecht te doen sal hebben aen de veen-
genoten geërft in den veenen tusschen Wageningen ende Renen
die heure consent schijnen gedragen te hebben in de contributie
van den costen te doen om een vaert te maecken tot in den Rhijn
toe ende den torf die daer gegraven soude mogen wordden
also te gelde te mogen maecken.

246 Maximiliaen van Bourgongnen, marcgrave van der Veer, etc. ritter van der ordere van den gulden vliese, admirael van der zee, stadthouder generael, president ende raiden 's keysers in den hove van Utrecht, den eersten duerwaerder ofte pander van in den selven hove hier op versocht saluyt. Wy bevelen u dair toe committerende mits desen dat ghy ten versuecke van die hoofden ende cameraer van den ghemeen veenghenoeten ende gheerfden der Renensche ende Geldersche veenen, impetranten de acte judicael ende condempnatoir in date den 13e novembris anno 1555 hier aen gehecht vanwegen des conincx op ende jegens Jan de Roy als dyckgraeff mit zyn consorten gedaagde ende gecondempneerde ter behoirlicker executie stelt realick ende by feyten alst behoirt mits nemende daer van uwen behoirlicken sallaris. Des te doene geven wy u volcomen macht, auctoriteyt. Bevelende allen justicieren, officieren, dienaren ende ondersaeten des conincx dat zy u dit doende obedieren ende assisteren. Gegegeven te Utrecht onder 't zegel van justicie van den voirscreven hove hier aen doen hangen op ten 9e decembris anno 1555.
By myn heer den stadthouder generael, president ende raiden 's konincx in den Hove van Utrecht.

245 Alzoe Johan Fox als penningmeester van die hoofden ende cameraer van den ghemeen veenghenoten ende gheerfden der Renensche ende Geldersche veenen, impetranten, van den Hove van Utrecht ghepresenteert hadde op ende jegens Jan doe Roy als dyckgreff, Willem Lyster, Marten Tulman, Jan van Harn, Bernt van Wyck, als hemraden, ende Goosen van Lynden als doen wesende secretaris tot Rhenen, gedaagden, om provisie te begeren, is Andries Niedenik als procureur van den zelven gedaagden noch dach gegeven m te antwoorden op 't versouck van maendaghe achten naestcomende. Off by faulte van dien den tyt overstrecken zynde condemneert 't hoff den gedaagden op huere cost te leveren de originael contact by den impetranten versocht. Actum te Utrecht den 13e novembris anno 1500 vyf ende vyftich.