HOUTHEM ST. GERLACH
Sjeng Rouvroije

St. Gerlachus waor eine ridder, dae de letste laevesjaore hiël sober gelaef haet
en dae nao’t plotseling sjterve van zien vrouw, zig hiël väöl haet gebaed.
Hae ging baewaeg nao Roame en deeg van alle aardse bezittinge afsjtaand.
Auch eder waek te voot nao St. Servaos, daomet houwer eine hechte baand.
In Houthem laefde hae hiël sober en Godsvruchtig, in ein haol eik wie me zaet.
In de kerk zuut me prachtige moersjilderinge, die eine kunstenaer gemaak haet.
In die sjilderieje is de laeveslaup van St. Gerlachus oetgebeeld öngeluiflek sjoan
en de plafon, ig num ’t den hemel, sjpint met zien sjilderwerk de kroan.
Wat Houthem oug nog haet, kort bie, hoag oet vief menuute laupe der heen
dan beste in Geulhem, en kinste in de Geulemerberg, echte grotwoninge zeen.
Aug haet Houthem önderdaak gegaeve aan Bush den Amerikaanse Prezedent.
Euver dat sjitterend Hotel Chateau St. Gerlach, waor de man mië es content.
En die Ministersj, die dao nog vergaderd höbbe, gluif mer dat waor ei gekakel,
Houthem waor militaer gebied, helicoptersj in de loch, tjonge wat ei sjpektakel.
Dan höbbe ze de Brassband St. Gerlach, dae iërsj es fanfare, al 130 jaor besjteit,
Ig kin geine Brassband, dae ‘t 15 kielemaeter in den umtrek baeter deit.
Dan de sjportvereiniginge, voetbal, me veural handbal, es me dao euver begint,
die zint met hun toernooi van hoonderde clubs, in gaans Europa bekint.
Dan blif nog de sjötterie St. Martinus, hiël oud die ig neet vergaete waor,
wie zouw me de sjöttersjvrun kinne vergaete, ein vereiniging van 410 jaor.
‘t Waor neet de bedoeling dat ig in de historie van Houthem vreutele gaon,
dao höbbe ze eige luu veur,die dat lang en breid in beuk höbbe sjtaon
Dit is gewoon ein verhäölke op reim, euver dat Goddelek plaetske aan de Geul,
ig haup dat ’t mien laezersj kint bevalle, dat geuf mig dan wir ei good geveul!