’n Sjtegelke ies ‘ne speciaal geconstrueerde inge doorgank, bedoeld um eine persoon per kièr door te laote. ’t Woord sjtegel kump waarsjienlik van ste(e)g, wat sjmale weeg beteikent of van ’t Duutsj Steige in de beteikenis van trepke. Zoa’n stegelke ies gemaak van houte päölkes en planke. De bedoeling ies um de dere die in de wei loupe binne de umheining te houte, want keu, sjäöp en paerd passe neet door dae sjmale (of verhuègde) doorgank. Dao besjtoon ouch iezere meulekes of drièpeurtsjes woabie eine persoon via ’n kruusraad kènt mètdrièje nao d’n andere kant. Zoa’n drièsjtegelke weurt ouch tourniquet (oet ‘t Frans) geneump. In vreuger jaore lepe väöl paedsjes door velder en weie um de luuj regelrech nao de kèrk te veure, de zoageneumde kèrkepaedsjes. Ze lepe sóms via sjtegelkes door de weie van de boer. Allewiel zint ze dèks ónderdeil van ’n wandelroute. Dao besjteit nog ’n ander soort bewaegbaar aafsjleting veur ‘n paedsje of ‘ne ingank nao de tuin, namelik ’t vaeke. Dat ies ’n sjarnerend peurtsje gemaak van houte latte, dat, doordat ’t neet waterpas hingk, vanzelf toeklap of vèlt. ’n Breier maot weurt vauwer(e) geneump. In vreuger jaore deeg me mèt zoa’n bewaegbaar hèkwerk ‘ne weeg aafsjlete um ’t viè tege te houte. De naam Vauwersjtraot geit dao op truuk. Um de binnehoof van ’n boerderie aaf te sjlete maakde me gebruuk van ’n weuste houte poort. In zoa’n poort, die lestig te hantere waor, goof ’t dèks nog ’n apaart peurtsje um persone in en oet te laote. Ouch de toegank van garages en sjure weurt aafgesjlote mèt ’n poort. ’n Breer ies ’n sjarnerend hèkwerk dat tösje twiè moere of pilere hingk.