Sjtraobaek Sjtraobaek is e gehuch bie Brokem-Valkeberg, veur 't iersj geneump in 1331.
Hoes Sjtraobaek waor 't stamhoes van 't gesjlach Strabach, waarsjienlik 'n familie van liege adel. De aansjtoatende Sjtraobaekerhaof is 'n carreboerderiej die daobie huerde (noe rieksmonument). Aan 't "Sjterk laok" (Sjtrabekerveldweg) woort in 1863 Villa Sjtraobaek geboewd. Op de krusing met de Klatersjtraot sjteit'n houte waegkruus en 'n kapel, oet 1894, gewiejd aan de Heilige familie. Door Sjtraobaek sjtruimp de gelieknamige baek richting de Geul. Naeve de autobaan A79, met 'n hoag betonne brok euver'tbaekdal, lop hie de groate ouwe, Romeinse, waeg door 't gehuch. Deze "Via Belgica" leep van Boulogne-sur-Mer, door Sjtraobaek, in eine rechte tien nao Kolle. Aan de voor van de Klevertberg of Baeksjtraot hobbe ze twie Romeinse graver gevonge. In de Ravesbosj, dae zich van hie tot op de Billich (Haasdal) oetsjtrek, zint reste van Romeinse villa's opgegrave. In 't midde van de 19e iew boewde Generaal A.P. de Ceva zich e kesjtielke, de taegewoordige Gierlingshof. De bewonersj houwe indertied 'n treinhalte, op verzeuk, aan 't sjpaor tosje Mestreech en Haerle. In 't aafgebraoke koetsjhoes haet de dichter .Jan Hanlo gewoond. Gezeen de ligking van de besjraeve, allenei in mergel opgetrokke, geboewe, is 't eige plaatsnaambord "Strabeek" te wied richting St. Gerlach geplaats.