17 Voir scepen Bernt Dircx, Jan Art Zelen. Dirck Jan Dericxs belooft te betalen Hanrick Gijben coster tot Lith 10 karolus gulden min 5 stufers op meijdach naestcomende Philippi et Jacobi apostolorum.

18 Voer scepen Bernt Dercx ende Jan Art Zelen. Willem Jan Dericx belooft te betalen Hanrick Goerts van Maeren tot behoeff Cristinen wedue sellichger van Hanrick Roverss 18½ gulden op baumisdach naestcomende. Akte doorgehaald.

19 Voer scepen Bernt Dericx, Willem Henricx. Art van Zambeeck scoltet ende heer van weegen onsen erwerdichger heere van Sinte Lambrech kerck tot Ludick verleent Peter Artss ende Dirick Steevenss scepen tot Heesse die eerde om toe horren een kond ende waerheit van ende voer ons scepen tot Lith Bernt Dericx ende Willem Henricx, dats to weeten dat Art van Zambeeck heft geloeft voer ons scepen dat hij sal lossen quijten ende affleggen aen Leenart Emkenss gemeijnlick geheiten vader van Nistelraeij 40 karolus gulden, dat Lambrecht Bernt Diricxs hij ende sijn nae erffgenamen daer nummermeer tot gheenen daegen ende thijden sacade noch kommer van vercrigen en sal mitten pacht die nu op onser lever vrouwen dach lichtmis verschijnen sal metter betaelen van Arden voirs, in geval dat dit aldus nijet en geboerden daer eerstelicke scade ende kommer doir vercreech ende geborden so sal Lamert Bernts aenfangen vrij ende los ende eewelicke ende erffelicke besitten enen mergen lants als voir diese 40 gulden voers die geleegen is op die corte weijen tot Lith ende komen is van Bijken Lamertss.

20 Voer scepen Lamert Hugenss ende Jan Art Zelenss. Hanrick Gossenss van Drijell als man Elizabet Peters dochter van Emrick sijnre huijsvroue, verhuurt Ambrosio Janss van Zambeeck een huijs, hostat mitten hoff ende boegaert in Groot Lith, ende Lisen achtergelaeten van heer Stensen van Tuijl, 6 jaer lanck durende sonder middelt ende aengaende op dat hochtit van Paeschen laetsleeden in dit teegenwoerdichge jaer des jaers voir 9 karolus gulden ende 5 stufer, alle jaer toe betaelen opten paesdach. Mit bescheit dat Hanrick Gijben coster tot Lith halden sal den hoff 3 jaeren als hij die gehuert heft van Lisen voers, ende wat hij vanden coster boirt siaers vanden hoff sal aen affcortijngh der summen van Brussen sijn siaers. Noch ist voerwaert dat Ambrosius van Zambeeck sal nae diesen 6 jaeren voirs dat huijs etc weer over leeveren in sulke gereeck van thuijnijngh heijmijngh ende potijngh als Berns voirs dat aengevangen heft, mer off daer gebreck quaem in dack off wonden toe maeken aent huijs dat sal Brus macken ende Hanricke ende Lise corte aen hoer hure siaers. Item den oven int huijs staende salmen affbreeken ende nijet meer in backen na diesen tit; ende den dick die teegen die hostat leedt ende mit recht totter hostat behoirt die sal Ambrosius alzoe hauwen ende verwaeren, dat die scau altit dair over gaen sal die jaeren durende. Noch sal Brus die willichge totter hostat behorende ten drij jaeren knoeten als die knodber sijn ende die hostat daer met heijmen ende voert watter gebreeck is van rijsmeer die sal Brus coepen ende heijmen buijten Henrici commer ende scade ofte Lisen sijnre huisvroue.