Reup emes: "Hij", dan reageert minnigein mèt "Hei?, dao maaks se besseme van!" en dat ies of eigelik dat waor. ´ne Ouwerwètse bessem woort inderdaad gemaak van tek van de berk of wortele van 't pijpesjtrootje, algemein veurkómmend op de hei. Zoa'ne bessem woort veural gebruuk um blaar en rómmel bie-ein te kere. Oze sjtieve boetebeursjtel ies dao 't vervolg op. Veur 't fiener vaegwerk binneshoes gebruukde me vreuger de sjtengele van de huttentut. 't Versjil mèt de beursjtel van noe ies dat dae minder groof ies, gemaak van fiener materiaal zoa-es paerdshaor of verkeshaor, of gans modern van nijlon vezels. In 't volksgeluif waor de bessem 'n symbool van gelök ofwaal 'n attribuut tege ónheil. Hae waor ouch 't symbool van de heks. Bie 'ne heksebessem dinke v'r metein aan zoa'ne ouwerwètse, zelf ineingefiesternölde bessem meh 't ies ouch de volksnaam veur 'n sjpontaan woekering van tek in de kroan van 'ne boum. Rónd de bessem ontsjtinge bès waal get gezèkdes en oetdrökkinge. Mèt 'ne bessem vaeg me 't óngelök weg. 'ne Bessem neve de veurdeur beteikent welkom en daoneve jeug hae sjpoake en duvele weg. Um die rae woort vreuger bie 't boewe 'ne bessem onder 't versjteek (fundament) gelag. "Dao liek 'ne bessem onder 't versjteek' zagte ze van luuj die väöl gelök houwe. Van emes dae sjtraoterm waor, op 't moment dat hae ziech in 't dörp vestigde, ging de oetdrökking dat hae geland waor op 'ne bessemsjteel. Nuuj besseme vaege sjoan, zègke ze van de nuje baas dae de zaak op 'n gans andere meneer benadert. De oetdrökking: Ièrsj 'ne bessem, dan 'ne sjroeber wilt zègke dat 't nuje draaf geit. Örges de bessem doorhaole beteikent de groate poets doon. Haet emes get väöl commentaar op 'nen andere, dan reageert me dèks mèt:"Vaeg lever veur eige deur!". (Begin bie diechzelf en dan bie de ander).