In den jaer ons Heren dusent vyfhundert ene sovenendertych is dyt boek gefondert tot een stadt boek bynnen onser stadt Ummen daer men in teken sal alle wtgangen eende oplatynge van husen ende haven lant eende sant buten ende bynen, hoe dat gelegen mach wesen nae alle olde gewonten eende nae onser Stadt Rechten ende dat toe ghelden nae dese naebescreven artykelen.
Item in den eersten van elken wtghanck ende vertychnysse sal men gheven eene tacke wyns ende een mengelen wyns toe tekenen den scryver.
Item ten anderden ofte daer ement dat boek wolde ghelesen hebben daer sal he van gheven een mengelen wyns toe elker tijt als emens des bedervet.
Item ofte daer emant were de een hangende segel van der stadt begerde, dat sal hem kosten een stucke goldes tot elken tyt.
Item ofte emant begerde een plakates zegel, dat sal hem kosten een kanne wyns toe elker tyt soe vaeke als des gescheet ende ellyker eet ock een kanne wyns.
Item de sekretarys sal hebben van ellyck schyn toe scryven enen mengelen wyns ofte tekenenge in dyt vors boek.
Item ofte ement walde admalynge doen an huse ofte have met rechte, de sal van vertyn dagen toe vertyn dagen de admalynge doen met onsen denre, dat sal kosten an der stadt toe ellyker tyt ene take wyns ende den deenre een mengelen wyns toe ellycker tyt ende want de echghenynge geschet kostet an der stadt ock ene taeke wyns.
Item ofte enych beslach geschede an emans goet, daer sal de denre van ellyck beslach hebben enen gassseler ende enen gesseler toe ellycker tyt toe tekenen op dat nemant verkort en worde in synen rechte ende want de dre beslage gescheet synt , sal men de saekewolder daer op verwyttygen op den vertinden dach ende den beslager eechenen an den guede; daer sollen de scheppenen van hebben ene kanne wyns ende van ellyck besalch *  toe ontslaen een kanne wyns.
Item darnae sal men dat guedt verkopen ende opslaen by der kerke als nae stadrecht behort.